Казакстандык белгилүү ырчы Димаш Кудайберген дүйнөлүк сахнада таанылуусуна “Мейкин Азия” фестивалы чоң түрткү болгонун айтты. Бул тууралуу ал бүгүн Ысык-Көлдүн Чолпон-Ата шаарында өткөн маалымат жыйынында билдирди.

“Мен чоң сахнага болгон алгачкы кадамымды дал ушул фестивалдан баштагам. Ар кандай эл аралык фестивалдарга катыштым, бирок ‘Мейкин Азия’ мен үчүн өзгөчө мааниге ээ. Азыркы Димаштын өзүнө болгон ишенимин бекемдеген сахна ушул болгон. 18 жашымда ушул сахнага чыгып, колдоо тапканыма ыраазымын. Ошол кезде мага ишенип, колдогон кыргыз элине жана уюштуруучуларга терең ыраазычылык билдирем”, — деди ырчы.