Ноокат районунда эки жаран мал уурдоого шектелип камалышты. Бул тууралуу Ош облустук милициясы билдирди.
Маалым болгондой, милицияга 50 жаштагы жаран кайрылып, 23-февралга караган түнү белгисиз адамдар сарайынан 2 баш малын уурдап кеткенин билдирген. Алардын баасы болжол менен 150 миң сомго жетет.
Бул факт боюнча Кылмыш-жаза кодексинин 205-1-беренеси (мал уурдоо) боюнча кылмыш иши козголгон.
Иликтөө иштеринин натыйжасында 26-февралда шектүү катары Ноокат районунун 26 жаштагы М.У. жана 24 жаштагы Т.А. аттуу тургундары кармалган. Соттун чечими менен алар 2 айга камакка алынган.
Шектүүлөр уурдалган малды базарга алып барып, сатып жиберген.
Учурда уурдалган 2 баш малды ээсине кайтаруу иштери жүрүүдө. Ошондой кармалгандардын башка кылмыштарга катыштыгы текшерилүүдө.
