Социалдык тармактар Казакстандын биринчи президенти Нурсултан Назарбаевдин бир тууганы Болат кыргыз-казак чек арасынан өтүп кеткени тууралуу документти таратып жатышат. Бул тууралуу 24.kg өз булактарына таянып жазды.
Документте Болат Назарбаев 6-январь күнү саат 05:36да Кыргыз Республикасынын аймагына автоунаа менен киргени айтылат.
24.kg агенттиги өз булактарына таянып, Нурсултан Назарбаевдин бир тууган агасы чындап эле чек араны «Ак-Жол – Автодорожный» (КР) – «Кордай – Автодорожный» (РК) өткөрмө бекети аркылуу өткөнүн билген.
«Болат Назарбаев Кыргызстандын аймагына 6-январда кирген. Бирок ошол эле күнү «Манас» аэропортунан Бишкек-Дубай каттамы боюнча учуп кеткен», — деп билдирди редакция.
УКМКнын Чек ара кызматы бул маалыматты купуялуулукка шылтоолоп, комментарий берүүдөн баш тартты.
