Бишкекте 11-февралда өрт чыккан Жүрөк хирургиясы жана органдарды алмаштыруу илим изилдөө институтуна буга чейин өрт коопсуздук эрежелери боюнча эскертме берилген. Бул тууралуу Өзгөчө кырдаалдар министрлиги билдирди.
ӨКМдин маалыматы боюнча, 2024-жылы 26-мартта алардын Өрттү көзөмөлдөө кызматы Жүрөк хирургиясы институтунда текшерүү жүргүзүп, 18 пункттан турган бузууларды четтетүү тууралуу эскертме берген. Кийин эскертүүлөр толук кандуу аткарылбагандыктан мекемеге Укук бузуулар кодексинин 143-беренесине ылайык 23 миң сом айып салынган.
Текшерүүнүн негизинде эки суу алуучу гидрант оңдоп-түзөөдөн өткөрүлүп, ишке берилген.
Министрлик Өрттү көзөмөлдөө кызматы тарабынан социалдык мекемелер, эл көп каттай турган соода борборлоруна тынымсыз көзөмөл жүргүзүлүп турарын билдирди.
Эскерте кетсек, 11-февралда болжол менен саат 21:00дарда Жүрөк хирургиясы институтунда өрт чыгып, 23:15те толук өчүрүлгөн.
Өрттүн айынан эки бейтап — 1 жаш 7 айлык наристе жана 16 жаштагы өспүрүм каза болгон. Дагы 9 адам иске ууланган. 31 бейтап башка ооруканаларга которулуп, операцияны күтүп жаткан 19 бейтап үйүнө жөнөтүлгөн.
Жүрөк хирургиясы институтундагы өрттүн айынан наристе жана өспүрүм каза болгон
