Министрлер Кабинети Афганстандын Кичи жана Чоң Памиринен келип жаткан этникалык кыргыздарга жана кайрылмандарга колдоо көрсөтүү боюнча 2026–2029-жылдарга карата программаны бекитти. Бул тууралуу өкмөттүн басма сөз кызматы билдирди.

Программа Кыргызстанга келип жаткан этникалык кыргыздарга жана кайрылмандарга колдоо көрсөтүү максатында кабыл алынган.

Тиешелүү токтом менен ошондой эле этникалык кыргыздарды жана кайрылмандарды колдоо боюнча иш-чаралар планы жана анын бюджети бекитилген.

Токтомго ылайык, мамлекеттик жана жергиликтүү өз алдынча башкаруу органдары аткарылган иштер боюнча маалыматты ар бир квартал сайын Эмгек, социалдык камсыздоо жана миграция министрлигине берип турууга тийиш. Министрлик өз кезегинде жарым жылдыктын жыйынтыгын Президенттик администрацияга берүүгө милдеттендирилет.