Ош облусунун Ноокат районунда бир нече жаранды 44 млн сомго алдап кеткен деп 43 жаштагы жаран кармалды. Бул тууралуу облустук милициядан билдиришти.
Милициянын маалыматы боюнча, ноябрдын аягында аларга Кара-Суунун тургуну кайрылган. Ал билдиргендей, быйыл 24-июлда сыртынан тааныш болгон Ноокат районунун 43 жаштагы тургуну (У.Т.) анын малын 19 млн сомдон ашык акчага баалап алып, кийин акчасын бербей изин жашырып кеткен.
Аталган факт боюнча «алдамчылык» беренеси менен кылмыш иши козголгон.
Иликтөөнүн жүрүшүндө 7-декабрда шектүү катары 43 жаштагы У.Т. кармалган. Соттун чечими менен ал тергөө аяктаганга чейин камакка алынган.
Андан кийин анын үстүнөн дагы 4 киши арыз жазган. Жарандарга 44 млн сомдон ашык зыян келтирилген.
