Ош шаарындагы Юрий Гагарин атындагы мектеп толук капиталдык оңдоп-түзөөдөн өткөрүлүп, расмий түрдө пайдаланууга берилди. Бул тууралуу Ош мэриясы билдирди.

Мектептин ачылышына шаар мэри Жеңишбек Токторбаев, шаардык кеңештин төрагасынын орун басары Ниязбек Нурбаев катышты.

Мектепти оңдоо иштерине республикалык бюджеттен акча каражаты бөлүнгөн. Эки кабаттуу мектептин ичи, сырты актап-сырдалып, чатыры жаңыланып, окуу бөлмөлөрү толугу менен оңдолгон. Спорт зал, ашкана, ажатканалар жаңыланган.

Ошондой эле парта, отургуч жана башка керектүү жабдуулар толугу менен алмаштырылып, окуучулар үчүн ыңгайлуу шарттар түзүлгөн.