Россиянын тез тамактануучу ресторандарынын таанымал «Вкусно — и точка» тармагы эл аралык рынокко чыга баштады. Россиялык ЖМКлар тармактын басма сөз кызматына таянуу менен билдиргендей, компаниянын алгачкы чет элдик багыты Кыргызстан болмокчу.

Тармактын негизги юридикалык жагы — «Система ПБО» компаниясы кыргызстандык өнөктөшү «Алькрест Фуд» менен коммерциялык концессия келишимине кол койду. Макулдашуунун шарттарына ылайык, аталган компания республиканын аймагында франшизаны өнүктүрүү менен алектенет.

Кыргызстанда «Вкусно — и точка» ресторандарынын алгачкыларын ачуу 2026-жылдын аягына пландаштырылууда. Бардык ишканалар башкы тармактын бирдиктүү сапат стандарттарына так ылайык иш алып барышат.

Долбоор узак мөөнөттүү келечекке эсептелген. Жакынкы беш жыл ичинде өлкөдө тейлөөнүн ар кандай форматындагы 15тен ашык ресторан ачуу пландалууда. Тармакты ишке киргизүү республикада 750гө жакын жаңы жумуш ордун түзүүгө мүмкүндүк берет деп күтүлүүдө.

«Вкусно — и точка» тармагы Россияда 2022-жылы негизделген. Ал россиялык рыноктон кеткен америкалык McDonald’s корпорациясынын активдерин ишкер Александр Говор сатып алгандан кийин, алардын базасында түзүлгөн.