Кыргыз Республикасынын Президенти Садыр Жапаров күч түзүмдөрүнүн жетекчилик курамындагы кадрдык алмашуулар тууралуу жарлыктарга кол койду. Расмий документтерге ылайык, Рустам Мамасадыков КР Коопсуздук кеңешинин катчысы кызматынан бошотулду.

Мамлекет башчысынын башка жарлыгы менен Мамасадыков Улуттук коопсуздук мамлекеттик комитетинин (УКМК) төрагасынын биринчи орун басары болуп дайындалды. Эскерте кетсек, ал 2025-жылдын 1-декабрында Коопсуздук кеңешине дайындалганга чейин да УКМК төрагасынын биринчи орун басары кызматын ээлеп келген.

Бул чечим атайын кызматтын жетекчилигиндеги масштабдуу кадрдык өзгөрүүлөрдүн алкагында кабыл алынды. Буга чейин бүгүн Камчыбек Ташиев УКМК төрагалыгынан жана вице-премьер-министрлик кызматтардан бошотулуп, комитеттин төрагасынын милдетин аткаруучу болуп Жумгалбек Шабданбеков дайындалган. Рустам Мамасадыков жарлыкка кол коюлган учурдан тартып УКМКдагы милдеттерин аткарууга киришет.