Хатлон облусуна караштуу Кубодиен районунун тургуну, 30 жаштагы Дилноза Мамадова Жаңы жыл алдында беш эм – эки эркек, үч кыз төрөдү. Ага чейин эки баласы болгон.
Ымыркайларга Хасан, Хусейн, Фатима, Зухра жана Хадича деген ысым ыйгарылды.
Хатлон облусунун төрагасы Курбон Хакимзода беш эмдин ата-энесинин үйүнө барып, каржылай колдоо көрсөттү.
Бул арада соцтармактардын колдонуучулары өлкө президентине кайрылып, беш эмдин ата-энесине Душанбеден батир белекке берүүнү сурашууда.
Тажикстанда беш эм төрөлгөн учур биринчи жолу катталууда.
2015-жылы төрт эм төрөгөн Душанбе шаарынын тургунуна мамлекеттен үч бөлмөлүү батир берилген.
Бул арада Тажикстанда төрөт деңгээли жогору: постсоветтик мамлекеттердин арасында калкынын көбөйүшү боюнча биринчи орунда келатат. Божомолдор боюнча 2030-жылга карата Тажикстандын калкынын саны 11 миллиондон ашары күтүлүүдө.
