Президент Садыр Жапаров Ысык-Көлдөгү аты жок тоо чокуну «Бириккен Улуттар Уюмунун чокусу» деп атоо жөнүндө мыйзамга кол койду. Бул тууралуу президенттин маалымат кызматы билдирди.

Мыйзам 2024-жылы 25-декабрда парламент тарабынан кабыл алынган. Ал президенттин жарлыгынын негизинде жана Кыргызстан менен БУУнун өз ара алакасын арттыруу үчүн иштелип чыккан.

«Бириккен Улуттар Уюмунун чокусу» деген ат берилген чоку Ак-Суу районунда Сары-Жаз тоо кыркасынын Түштүк Эңилчек мөңгүсүнүн аймагында жайгашкан. Анын бийиктиги 5576 метрге жетет.

Кыргызстан БУУга 1992-жылы 2-мартта кирген. БУУ эл аралык абройлуу уюм болуп саналат. Кыргызстанга ар тараптуу колдоо көрсөтүп келет.