Бүгүн, 28-декбрда Жогорку Кеңеш Россиянын Чек ара кызматына Бишкектен жер тилкени 49 жылга ижарага берүүнү үч окууда жактырды.
Жыйында Мамлекеттик мүлктү башкаруу фондунун башчысы Мирлан Бакиров билдиргендей, 2000-жылы Кыргызстан менен Россия «Чек ара кызматкерлеринин биргелешкен иш-аракеттери жөнүндө» келишим түзүп, эки тарап бир нече милдеттенмелелерди алган.
«Кыргызстандын Россиянын чек ара кызматкерлерин, үй-бүлөсүн турак жай жана казарма менен камсыз кылуу милдети болгон. Келишимге ылайык, алар 2013-жылга чейин Новопокровка айылында туруп келген. Ал жердеги имараттар жараксыз абалга келгендиктен, Бишкектеги Жибек Жолу жана Күрөңкеев көчөлөрүндө жайгашкан эки имаратты жеке тараптардан ижарага алып, иштетип келиптир», — деди ал.
Андан соң Россиянын Чек ара кызматы жеке жактардан эки имаратты сатып алып, жер чет элдиктерге сатылбагандыктан алар имараттар турган (ага караган) жерди ижарага алууну чечкен. Аталган жердин аянты 1 миң 480 чарчы метрди түзөт. Россия 1 миң 480 чарчы метр жерди 2 миң 901 долларга 49 жылга ижарага алат.
Эскерте кетсек, быйыл июнь айында Россиянын Чек ара кызматы Бишкектин Жибек Жолу жана Күрөңкеев көчөлөрүндө жайгашкан жерди ижарага алууну пландап жатканы белгилүү болгон.
Россия Бишкектеги жерди 2,9 миң долларга 49 жылга ижарага алат
Биздин Телеграм каналга катталыңыз
