Кыргызстандын Жогорку Кеңеши 24-декабрда салык салуу жана социалдык камсыздандыруу маселелери боюнча актыларга өзгөртүүлөрдү киргизүү тууралуу мыйзам долбоорун ыкчам тартипте, дароо үч окууда кабыл алды. Бул ата мекендик бизнести колдоого жана президенттин жарлыктарын ишке ашырууга багытталган. Документ экономиканын негизги секторлоруна, анын ичинде унаа рыногуна, жеңил жана зергер өнөр жайына масштабдуу жеңилдиктерди киргизет. Бул тууралуу ЖКнын басма сөз кызматы билдирди.

Негизги чаралардын бири — жеке жана юридикалык жактарды транспорт каражаттарын сатууда салык төлөөдөн толук бошотуу, ошондой эле жарандардын автоунааларды реэкспорттоо операцияларынын натыйжасында пайда болгон салык карыздарын кечүү болду. Мындан тышкары, ата мекендик унаа өндүрүүчүлөр сатуудан алынуучу салыктан бошотулат.

Түзөтүүлөрдүн олуттуу бөлүгү зергерчилик тармагына тиешелүү: өндүрүш үчүн жабдуулар жана керектелүүчү материалдар КНСтен (НДС) бошотулат, ал эми өндүрүүчүлөргө өз продукциясын өз алдынча сыноо жана белги (клеймо) коюу укугу берилет. Ошондой эле зергер буюмдарынын калдыктарын легалдаштыруу үчүн 2 айлык мөөнөт киргизилүүдө, бул учурда Салык кызматы тарабынан текшерүүлөргө мораторий жарыяланат.

Мыйзам бизнес үчүн жаңы жеңилдетилген чендерди белгилейт: Кыргызстандын аймагынан тышкары жүргүзүлгөн ишмердүүлүк үчүн бирдиктүү салыктын чени 0,1%га чейин, чет өлкөлүк банктар аркылуу жүргүзүлгөн транзакцияларга салык 0,1%га чейин төмөндөтүлдү.

Мүлктү ижарага берген жактар үчүн камсыздандыруу төгүмдөрүнүн чени кыскартылган орточо айлык акынын 6%ы деңгээлинде бекитилди. Ошондой эле документ тигүү жана текстиль өнөр жайы үчүн салык жүгүн азайтууну карайт жана алкоголдук продукцияны чекене сатууну лицензиялоону жокко чыгарат.