IV Элдик курултайдын жүрүшүндө президент Садыр Жапаров онлайн режиминде бир катар ири өнөр жай объекттеринин ишине старт берип, муну менен 2025-жылдагы масштабдуу экономикалык өсүштү белгиледи. Бул тууралуу Экономика министрлиги билдирди.

Үстүбүздөгү жылы Кыргызстанда жалпысынан 119 жаңы ишкана пайдаланууга берилип, бул долбоорлорго салынган инвестициянын жалпы көлөмү 715,7 миллион АКШ долларын түздү. Бул бүтүндөй республика боюнча дээрлик 8,5 миң жаңы жумуш ордун түзүүгө мүмкүндүк берди.

Мамлекет башчысы реалдуу убакыт режиминде алдыңкы өндүрүштөрдү: Чүй облусундагы «Стандарт Фарм Групп» фармацевтикалык заводун жана ширетүүчү устундарды (балкаларды) чыгаруучу ишкананы, Баткен облусундагы газоблок заводун, ошондой эле Бишкек жана Ош шаарларындагы «Маткасымов» жана «Эл Пласт» компанияларынын өндүрүштүк линияларын ишке киргизди.

Бул ачылыштар 2025-жылдын 11 айындагы иштин мыйзам ченемдүү жыйынтыгы болуп калды. Бул аралыкта өнөр жай продукциясынын көлөмү 685,9 миллиард сомго жетип, өткөн жылга салыштырмалуу 10%га өсүш көрсөттү. Индустриалдык өсүштүн кыймылдаткыч күчү катары көлөмүн дээрлик эки эсеге арттырган фармацевтика тармагы, үчтөн бирге өскөн курулуш материалдарын өндүрүү, ошондой эле тамак-аш жана химия өнөр жайы саналды.

Инвестициялык жигердүүлүк өлкөнүн бардык аймактарын камтыды: 35 жаңы объектиси менен Чүй облусу лидер болду, андан кийин Жалал-Абад жана Ош облустары турат. Тармактык алкакта инвесторлор курулуш материалдарын өндүрүүгө, айыл чарба продукциясын кайра иштетүүгө жана энергетикага басым жасашууда — быйыл эле 14 жаңы энергообъект ишке кирди.

Экономика министрлиги «100 өнөр жай ишканасы» демилгесин ишке ашыруу мамлекеттин ар тараптуу колдоосу астында, анын ичинде каржылоо, жерди трансформациялоо жана инфратүзүмдү тартуу боюнча жардам менен жүргүзүлүп жатканын баса белгилейт. Бул региондордун экспорттук дараметин бекемдөөгө жана социалдык-экономикалык өнүгүүсүнө түздөн-түз шарт түзөт.