Миллиардер Юрий Мильнер орус жарандыгынан баш тартты. Бул тууралуу ал Твиттердеги баракчасына жазды.
Анын айтымында, ал үй-бүлөсү менен 2014-жылы Орусиядан чыгып кеткен. Быйыл жайында жарандыктан чыгуу процессин расмий түрдө аяктаган.
Forbes журналы маалымдагандай, Юрий Мильнер акыркы айларда Орусия жарандыгынан баш тарткан үчүнчү ишкер болду.
Мильнер быйыл Forbes журналынын рейтингинде 15-орунду ээлеген. Анын байлыгы 7,3 миллиард долларга бааланган.
Миллиардер Израилдин жарандыгын 1999-жылы алып, АКШга көчүп кеткенге чейин бул өлкөдө бир нече жыл жашаган.
Жайында дагы бир миллиардер, Freedom Finance инвестициялык компаниясынын негиздөөчүсү Тимур Турлов орус жарандыгынан баш тартканын жарыялаган. Ишкер 10 жылдан ашык убакыттан бери Казакстанда жашап, быйыл бул өлкөдөн паспорт алган.
Казакстан кош жарандуулукка жол бербейт, ошондуктан Турлов орус паспортунан да, Кариб деңизиндеги Сент-Китс жана Невис штатынын паспортунан да баш тартууга аргасыз болгонун билдирген. Forbes 2022-жылы Турловдун байлыгын 2,4 миллиард доллар деп баалаган.
Сентябрда Еревандык ишкер Рубен Варданян да орус жарандыгынан баш тартуу чечимине келгенин билдирген. Муну ал Тоолуу Карабак Республикасынын (НКР) армянча аталышы болгон Арцахка көчүү чечими менен түшүндүргөн. 2021-жылы Forbes Варданяндын байлыгын 1 миллиард доллар деп баалаган.
Биздин Телеграм каналга катталыңыз
