25 жаштагы Маматкулова Айтурган Мустафаевнанын өлүмүнө шектүү адам кармалганын 31-августта Октябрь райондук ички иштер башкармалыгынын басма сөз кызматы билдирди.
Ал (1998-жылы туулган Н.Т.) Кылмыш-жаза кодексинин 128-беренеси («Өзүн-өзү өлтүрүүгө жеткирүү») менен шектелип, «тергөө учурунда чогултулган жана аныкталган фактылык маалыматтардын негизинде» кармалган.
Айтурган 2024-жылы 7-июлда Бишкектеги ооруканалардын биринде каза болгон. Ал оор абалда медициналык мекемеге жеткирилген. Дарыгердин баштапкы корутундусунда «Көп дарыдан уулануу, өзүн өзү өлтүрүү. Курч жүрөк-кан тамыр жетишсиздиги” деп жазылган. Ал ошол бойдон эсине келген эмес. Сөөк 8-июль күнү жерге берүү үчүн Ош шаарына жөнөтүлгөн.
Ошол эле учурда маркумдун жакындары Бишкек шаарында жүргүзүлгөн соттук-медициналык экспертизанын жыйынтыгына макул эместигин билдиришкен. Алар экинчи экспертиза жүргүзүү керек деп эсептешет, бирок бул жолу комиссия тарабынан. Алар Ош шаардык ички иштер башкармалыгына арыз жазышкан.
Кошумчалай кетсек, көз жумган келиндин жакындары күйөө баласын күнөөлөп, Айтургандын өлүмүнө жолдошу себепкер экенин айтышкан. Ишти Башкы прокуратура көзөмөлдөөдө.
