23-ноябрда Балыкчы шаарында “Борбордук Азиядагы аймактык коммуникацияларды жакшыртуу программасынын үчүнчү фазасы” долбоорунун алкагында түзүлгөн Туристтерди тейлөө борборунун салтанаттуу ачылышы болду.
Туризм фондунан билдиришкендей, борбор Ысык-Көл облусунда туристтик тейлөөнү жакшыртуу максатында түзүлгөн. Салтанатка Экономика жана Транспорт министрликтеринин өкүлдөрү, президенттин Ысык-Көл облусундагы ыйгарым укуктуу өкүлү, ошондой эле Дүйнөлүк банктын өкүлдөрү жана жергиликтүү бийлик өкүлдөрү катышты.
Жаңы борбор туристтерди маалыматтык камсыздоо, эс алуу зоналары, сувенирдик кичи базар, ажатканалар, унаа токтотуучу жайлар жана электромобилдерди кубаттоочу жай менен камсыздайт. Бул Ысык-Көлдүн жээгинде курулуп жаткан Түп, Теплоключенка, Тосор жана Бөкөнбаев сыяктуу тейлөө борборлорунун тармагынын объекттеринин бири.
Долбоор Дүйнөлүк банктын колдоосу менен Экономика жана коммерция министрлигинин алдындагы Туризм департаментинин буйругу менен Транспорт жана коммуникациялар министрлиги тарабынан ишке ашырылган. 2024-жылы объекттер Туризмди өнүктүрүүнү колдоо фондунун карамагына өткөн.
Балыкчы шаарындагы соода борбору облустун курортторуна барууну жеңилдетип, туристтик агымдын өсүшүнө салым кошуп, жаңы жумуш орундарын түзүп, Ысык-Көл облусунун экономикалык потенциалын чыңдайт деп күтүлүүдө.
Биздин Телеграм каналга катталыңыз
