Россиянын Кыргызстандагы «Кант» авиабазасында Улуу Ата Мекендик согуштагы Жеңиштин 80 жылдыгына карата “Саптык жүрүш жана ыр сынагы” аттуу аскер-патриоттук мелдеш болуп өттү.
Мелдешке Кыргызстандын мектептеринин окуучулары катышып, саптык даярдык, ок атуу боюнча тактык, машыгуу гранаталарын ыргытуу, АК-74 автоматын чогултуу жана ажыратуу ылдамдыгы, 16 килограммдык салмактагы гиряны жулкуп көтөрүү жана аркан тартыш боюнча өз өнөрлөрүн көрсөтүштү.
Мелдештин жыйынтыгы боюнча 1- орунду “Эпсилон” мектебинин командасы, 2- орунду “Ломоносов” мектеби, ал эми 3-орунду Канттагы авиабазанын ЮНАРМИЯ отряды ээледи.
Жеке номинациялар төмөнкүлөр мыкты деп табылды:
- «Мыкты аткыч»: абсолюттук жыйынтык көрсөткөн Расул Назаров (Ломоносов мектеби) — 30 упайдан 30 упай.
- «АК-74 автоматын чогултуу жана ажыратуу»: Семетей Жапаров (Эпсилон мектеби) ажыратууда 15 секунд, чогултууда 25 секунд.
- “16 кг салмактагы гиряны жулкуп көтөрүү»: Нурбол Абдыкапаров (Ломоносов мектеби), 60 кайталоону аяктаган.
Катышуучулар тартипти, чыдамкайлыкты, физикалык даярдыгын жана командалык маанайды көрсөтүштү.
Мелдеш спорттук-патриоттук гана эмес, Улуу Ата Мекендик согуш жылдарындагы элдердин эрдиктерин эске салып, муундардын тирүү байланышы катары кызмат өтөөрүн уюштуруучулар баса белгилешти.
Эске салсак,сынактын кийинки этабы 29-апрелде “Совет элинин Улуу Ата Мекендик согушка кошкон салымы” эл аралык онлайн-конференция форматында өтөт, ага Бишкек, Душанбе жана Екатеринбург шаарларынын мектеп окуучулары катышат.
