Орусиянын Геленджик шаарында курулуш иштери жүрүп жаткан аянттардын биринде уранды алдында калган 3 кыргызстандык жаран каза болду. Бул тууралуу Кыргызстандын Тышкы иштер министрлиги билдирди.
Алардын сөөгү 4-майда чыгарылып, шаардык өлүкканага жеткирилген. Кыргызстандын дагы бир жараны денесинен жаракат алып ооруканага түшкөн.
Кыргызстандын Орусиядагы элчилиги каза болгон жарандардын жакындарына консулдук жана юридикалык жардам көрсөтүүдө. Сөөктөрдү мекенине жөнөтүүгө байланыштуу бардык процедураларды координациялоо үчүн Геленджик шаарына элчиликтин кызматкери жөнөтүлгөн.
Биздин Телеграм каналга катталыңыз
