Эмгек министри Равшанбек Сабиров Bitmain жана Kincaid тобунун өкүлдөрү менен сүйлөшүүлөрдү өткөрдү. Ведомстводон маалымдалгандай, жолугушууда Кыргызстанда чет элдик инвестицияларды тартуу, биргелешкен долбоорлорду ишке ашыруу жана жаңы өндүрүш ишканаларын ачуу маселелери талкууланды.

Эмгек миграциясын кыскартуунун эффективдүү куралы катары өлкөнүн аймактарында жумушчу орундарын түзүүгө өзгөчө көңүл бурулду. Министр өлкөдө туруктуу экономикалык өсүш жана инвесторлор үчүн жагымдуу шарттарды түзүү, анын ичинде салыктык жана укуктук кепилдиктер менен колдоого алынган жагымдуу инвестициялык климатты белгиледи.