Президент Садыр Жапаров жайыттарды сактоо жана экологияны коргоо зарылдыгын белгилеп, жайлоолорду техника менен тебелебөөгө чакырды. Ал бул тууралуу Фейсбуктагы баракчасына жазды.

Мамлекет башчысы өлкө аймагындагы Каркыра, Ат-Башы, Ала-Бука, Чаткал, Алай, Чоң-Алай сыяктуу ири жайлоолорду кыдырып, көпчүлүк жерлерде жайыттар оор техникадан жабыркап, жолдор пайда болгонун билдирди.

“Жайлоолор такыр боло баштаган. 1970-жылдардан бери урук себилген эмес. Акыркы 4–5 жылдан бери урук себүү иштерин жүргүзүп келебиз, бирок бир жылда бардык жайлоолорду камтуу мүмкүн эмес”, — деди Жапаров.

Ал ошондой эле жайлоолордо таштанды маселесине токтолуп, жайлоочуларды жана туристтерди тазалыкты сактоого, көк шиберди коргоого жана айлана-чөйрөгө этият мамиле кылууга чакырды.