Кыргызстандын Өзгөчө кырдаалдар министрлигинин тик учагы “Жеңиш” чокусундагы куткаруу операциясынан кайтып келди. Бул тууралуу министрликтин басма сөз кызматынан кабарлашты.

Маалыматка ылайык, министр Бообек Ажикеевдин тапшырмасы менен 24-августта Ысык-Көл облусундагы Жеңиш чокусунда калган россиялык альпинистке жардам көрсөтүү максатында ӨКМдин “Airbus Н-125” үлгүсүндөгү тик учагы жөнөтүлгөн. Аны менен кошо чет өлкөлүк тажрыйбалуу учкуч жана альпинист-куткаруучу да болгон. Алар эки күн Каркырадагы базада күтүп турушкан.

Бирок чоку жайгашкан аймактагы аба ырайы кескин начарлап, учууга мүмкүнчүлүк бербегендиктен, кечээ 25-августта тик учак Чүй облусунун Аламүдүн районундагы туруктуу ордуна кайтарылды.

ӨКМдин Ысык-Көл облусундагы башкармалыгынын жетекчиси Мирлан Карабаев билдиргендей, “Жеңиш” чокусу жайгашкан өрөөндө суук эрте түшөт. Ошондуктан альпинисттер чокуга көтөрүлчү лагерди негизги база болгон Каркырага көчүрүп келишкен.

Эскерте кетсек, 12-августта россиялык альпинист Наталья Ноговицына “Жеңиш” чокусунан түшүп келе жатып, деңиз деңгээлинен 7200 метр бийиктикте жаракат алган. Аны куткарууга бир нече ирет аракет жасалган жана бул иштерди «Ак-Сай Трэвел» туристтик компаниясы жүргүзүп келген.

Ал эми ага чейин “Жеңиш” чокусундагы 47 жаштагы альпинист Наталья Наговицинанын сөөгүн түшүрүү боюнча куткаруу операциясы кийинки жылга чейин токтотулганы маалымдалган.