Депутат Эльвира Сурабалдиева башталгыч класстардын окуучуларын биринчи сменада окутуу маселесин карап чыгууну өтүндү.

Анын айтымында, учурда Бишкекте башталгыч класстын балдары кечинде, караңгыда үйүнө кайтып жатышат.

«Маселени карап көрүңүздөрчү. 5-6-класстан жогору окуучулар экинчи сменада окуса болот. Башталгыч класстарды эртең мененкиге койгула, кечинде көчөдө жүрбөй», — деди депутат.

Мындан тышкары, ал шаар тургундарынын окуу китептерине байланышкан арыз-муңун да билдирди.

«Дайыма жаңы авторлордун китептери чыгып жатат. Ар бир үй-бүлөдө үч-төрттөн бала бар. Бардыгына китеп сатып алуу үчүн 6–8 миң сом талап кылынат. Анан бир аздан кийин ошол автор ылайыксыз болуп калды дешет, бирок китепти ата-энелер кайра тапшыра алышпайт, компенсация берилбейт. Ушундан улам өтө көп чыгым болуп жатат», — деп белгиледи Сурабалдиева.