Бүгүн Токмок шаарында атайын техникаларды жана кызматтык унааларды тапшыруу аземи болуп өттү. Иш-чарага Министрлер кабинетинин төрагасынын орун басары, УКМКнын төрагасы Камчыбек Ташиев катышты.

Ташиев белгилегендей, техника жана унаалар Президент Садыр Жапаровдун атынан шаарды өнүктүрүү максатында берилди.

Президенттин 29-сентябрдагы №325 буйругуна ылайык, Стабилдештирүү фондунан Токмокко жалпы 2 млрд 55 млн сомдон ашык каражат бөлүндү.

Анын негизинде төмөнкү ири долбоорлор ишке ашырылат:

• Жолдорду капиталдык оңдоо жана куруу – 1 млрд 812 млн сом;
• Жугуштуу оорулар бөлүмүнүн жаңы имараты – 134,6 млн сом;
• Жаңы автобус жана атайын техникалар алуу – 108 млн сом.

Мындан тышкары, 2026-жылы Токмоктогу №1 жана №2 мектептер үчүн кошумча окуу корпустары курула баштайт. Ар бир корпустун долбоордук кубаттуулугу 800 орунду түзөт.

Камчыбек Ташиев жергиликтүү бийликке бөлүнгөн каражатты натыйжалуу пайдаланууну жана иштердин сапатын катуу көзөмөлдөөнү тапшырды.