Орусияда кыргызстандык Бекжан Сарбишев 16 жылга эркинен ажыратылды. Мындай чечимди Москва шаардык соту кабыл алганын орус басылмалары жазып чыгышты.

Окуя 2018-жылдын 9-сентябрында Москвада “Марьино” метросунда катталган. Анда Сарбишев карындашынын туулган күнүн белгилеп, кафеде чыгып баратып, башка мекендештер менен айтыша кеткен. Ал сыртка чыккандан кийин өзүн ур-токмокко алган деген жигиттердин тобун машинеси менен тебелетип кеткен. Унанын алдында 11 адам калып, бири каза болгон. Айыпталуучунун теги кыргызстандык, Орусиянын жараны.

Ош облусунун Өзгөн районунда туулуп өсүп, кийин Орусиянын жарандыгын алган Бекжан Сарбишевге “Адам өлтүрүү” беренеси боюнча кылмыш иши козголгон.