Жалал-Абад облусунун Базар-Коргон районунда 71 жаштагы карыя жашы жете элек небересин зордуктоого шектелип кармалды. Бул тууралуу облустук милициядан билдиришти.

5-февралда Базар-Коргон райондук милицияга жаран арыз менен кайрылган. Анын айтымында, 71 жаштагы М.М. аттуу киши өзүнүн үйүндө 15 жаштагы небересин сабап, андан кийин зордуктаган. Арыз ээси ага мыйзам чегинде чара көрүүнү суранган.

Аталган факт боюнча Кылмыш-жаза кодексинин “Зордуктоо” беренеси менен кылмыш иши козголгон. Жабыркаган кызга тийиштүү соттук-медициналык экспертизалар дайындалган.

Шектүү катары жогорудагы карыя кармалып, соттун чечими менен эки айга камакка алынган. Учурда тергөө иши жүрүп жатат.