Бүгүн, 25-ноябрда, Орусиянын президенти Владимир Путин Кыргызстанга мамлекеттик сапары менен келди. Аны “Манас” эл аралык аэропортунан өлкө башчы Садыр Жапаров тосуп алды. Бул тууралуу президенттин басма сөз кызматы маалымдады.

Маалыматка ылайык, Путинди тосуп алууда флагштокторго эки өлкөнүн туулары илинип, килем төшөлүп, ардак кароол ротасы тизилген.

Мындан тышкары улуттук боз үйлөр тигилип, этно-жоокерлер алгыр куштар жана тайгандар менен көчмөн эл маданиятынын элементтерин чагылдырышкан.

Андан соң мамлекет башчылар үчүн эки элдин музыкалык чыгармаларын аткарган кыргыз артисттеринин катышуусундагы чакан концерттик программа тартууланды.

Бүгүн, Садыр Жапаров менен Владимир Путиндин тет-а-тет форматындагы сүйлөшүүсү өтөрү айтылган. Эртең, 26-ноябрда, эки өлкөнүн башчылары күн тартибиндеги актуалдуу маселелерди жана стратегиялык өнөктөштүк духундагы кызматташтыкты мындан ары чыңдоо перспективаларын талкуулашат. Ошондой эле бир катар эки тараптуу документтерге кол коюу пландалууда.

Ал эми 27-ноябрда Бишкекте ЖККУнун Коопсуздук кеңешинин жыйыны өтөт.