Бүгүн, 26-ноябрда, Бишкек шаардык nез жардам ооруканасында заманбап реабилитациялык жабдуу Rebless™ Planar’ды тапшыруу аземи өттү.

Rebless™ Planar — неврологиялык жана ортопедиялык оорулардын кесепетинен колдун кыймыл-аракетин жана булчуң күчүн калыбына келтирүүгө жардам берген, жогорку технологиядагы роботташтырылган реабилитация системасы.

Оорукананын башкы дарыгери Алмаз Кубатбековдун айтымында, жаңы жабдуу бейтаптардын заманбап калыбына келтирүү ыкмаларына болгон мүмкүнчүлүгүн кеңейтип, көрсөтүлүп жаткан медициналык жардамдын сапатын жогорулатат.

Белгиленгендей, бул сыяктуу жабдуулар Кыргызстанга биринчи жолу берилип жаткан жок: 2024-жылы да Корея Республикасынын Мамлекеттик сатып алуулар кызматы жана Сатып алуулар боюнча корей институту сатып алган Rebless тибиндеги 20 аппарат берилген. Ал жабдуулар Улуттук эне жана баланы коргоо борборуна, КММАга, Улуттук госпиталга, Жалал-Абад обулус аралык реабилитациялык борбору «Бакытка» жана Ысык-Көл облустук бириктирилген ооруканасына бөлүштүрүлгөн.

Бул жолу жабдуу Кореянын эл аралык кызматташтык агенттиги (KOICA) жана H Robotics компаниясынын (Корея Республикасы) колдоосу менен гуманитардык линия аркылуу берилди.