Бишкекте Мамлекеттик салык кызматынын кызматкерлери Саламаттык сактоо министрлиги менен биргеликте мыйзамсыз иштеп жаткан медициналык клиникаларды жана документсиз медициналык каражаттарды аныкташты. Текшерүүлөр рейддик салык көзөмөлүнүн алкагында жүргүзүлдү.

Жеке менчик клиникалардын биринен коштоочу документтери жок дары-дармектер, медициналык каражаттар жана жабдуулар табылды. Мындан тышкары, бул медициналык мекеме салык органдарында каттоодон өтпөстөн жана тиешелүү лицензиясыз иштеп келгени белгилүү болду.

Фармацевтикалык ишмердүүлүктү лицензиясыз жүргүзгөн Б.А.М. аттуу башка жеке ишкерге таандык кампадан Кыргызстандын медициналык буюмдар реестрине киргизилбеген медициналык дары-дармектер табылган. Текшерүү учурунда дары-дармектердин кутуларына «медициналык буюм» деген оригиналдуу марканын үстүнөн «косметикалык каражат» деген этикеткалар чапталгандыгы белгилүү болгон.

Текшерүүлөрдүн жыйынтыгында Мамсалык кызматы менен Саламаттык сактоо министрлигинин адистери актыларды түзүп, жалпы суммасы 5,2 млн сомдук препараттарды алышты.