Жогорку Кеңешке кезексиз шайлоо маалында прокуратура органдарына жалпысынан 25 арыз жана даттануу келип түштү. Бул тууралуу Башкы прокуратуранын Башкы башкармалыгынын прокурору Самат Жунусов 30-ноябрдагы брифингде билдирди.

Анын маалыматына караганда:

• 11 материал ИИМге жөнөтүлдү;
• 6 – БШКга берилди;
• 2 арыз боюнча кылмыш ишин козгоодон баш тартылды;
• 1 материал башкасы менен бириктирилди;
• 5 материал боюнча маалыматтык маалымдамалар түзүлдү.

Прокуратура өзгөчө көңүлдү мамлекеттик жана муниципалдык кызматкерлер тарабынан мыйзамсыз агитацияга бурууда. Социалдык тармактардагы мониторинг үзгүлтүксүз жүргүзүлүп жатат.

Ачыкка чыккан мыйзам бузуулар боюнча 5 прокурордук сунуштама берилген. Алардын каралышынын жыйынтыгы:

• 1 мамлекеттик кызматкер тартиптик жоопкерчиликке тартылды;
• 3 кызматкер иштен бошотулду;
• 1 сунуштама азырынча кароо стадиясында.

Жогорку Кеңеш депутаттарын шайлоо бүгүн саат 8:00дө башталды. Шайлоочулардын тизмесинде 4 294 243 жаран бар. Өлкө боюнча 2 492 шайлоо участкасы, чет өлкөлөрдө дагы 100 участогун иш алып барууда. Добуш берүү 20:00гө чейин уланат. Алдын ала жыйынтыктар участоктор жабылгандан көп өтпөй жарыяланат. Расмий жыйынтык 14-декабрга чейин чыгарылары күтүлүүдө.