Саламаттык сактоо министринин орун басары Темирбек Эркинов Пакистандын Кыргызстандагы элчиси Алтамаш Вазир Хан менен эки мамлекеттин саламаттык сактоо жана медициналык билим берүү тармагындагы кызматташуусун талкуулашты. Бул тууралуу министрликтин басма сөз кызматы билдирди.

Жолугушууда негизги көңүл Кыргызстандын медициналык окуу жайларында билим алып жаткан пакистандык студенттер үчүн окутуунун сапатын жогорулатууга бурулду.

Сүйлөшүүлөрдүн алкагында төмөнкү маселелер каралды:

• академиялык байланыштарды чыңдоо жана билим берүү стандарттарын өркүндөтүү;
• студенттердин практикалык даярдыгын кеңейтүү;
• эки өлкөнүн медициналык университеттери менен дарылоо мекемелеринин ортосунда кызматташууну өнүктүрүү;
• окутуучулар менен дарыгерлердин тажрыйба алмашуусун уюштуруу;
• биргелешкен илимий иш-чараларды өткөрүү.

Жыйынтыгында эки тарап медициналык билим берүү жана саламаттык сактоо тармагында кызматташтыкты андан ары өнүктүрүүгө кызыкдар экендиктерин ырасташты.