Кыргызстандын Министрлер кабинети үй-бүлөлүк салтанаттарды жана маркумду эскерүү үрп-адаттарын өткөрүүнүн тартибин жөнгө салган токтом долбоорун коомдук талкууга чыгарды. Демилге ысырапкорчулукка жана шаан-шөкөттүү майрамдар үчүн жарандар насыя алып, карызга батууга аргасыз болгон социалдык басымга каршы күрөшүүгө багытталган.

Сунушталган тартип иш-чаралардын кеңири чөйрөсүнө жайылтылат: үйлөнүү тойдон жана кыз узатуудан тартып, бала төрөлгөндөгү, ажылык сапардагы жана сөөк коюудагы ырым-жырымдарга чейин камтыйт.

Үйлөнүү той салтанаттары үчүн долбоордо конкреттүү чектөөлөр жазылган. Коноктордун санын 200 адамга чейин кыскартуу сунушталат, ал эми 350дөн ашык конок катышкан масштабдуу тойлорду өткөрүүгө тыюу салуу каралууда.

Салтанат бир күндүн ичинде өтүшү керек. Үчтөн ашык унаадан турган той кортеждерине, фейерверктерге, кымбат баалуу шоу-программаларга жана конокторду баалуу белек берүүгө мажбурлоого тыюу салынышы мүмкүн.

Ошондой эле документте «кийит кийгизүү» жана «себет берүү» сыяктуу ашыкча чыгымдуу каадалардан баш тартуу сунушталат. Ал эми дасторкон даярдоого келсек, бирден ашык эмес ири мүйүздүү мал же бир жылкы союу сунушталууда.

Аза күтүү иш-чаралары үчүн да катуу ченемдер каралган. Сөөк коюлган күнү мал союуга толугу менен тыюу салуу пландалууда. Маркумдун жылыдыгын же башка күндөрүн (үчүлүгүн, жетилигин, кыркын) өткөрүү долбоордо милдеттүү эмес, ыктыярдуу иш-аракет катары белгиленген.

Эгер үй-бүлө эскерүү зыйнатын өткөрүүнү чечсе, документ жалаң гана эң жакын туугандарды чакырууну, чакан дасторкон жайып, майда жандык же бир баш ири мал союу менен чектөөнү сунуштайт. Жарандарды дүркүрөгөн той-аштын ордуна каражатты кайрымдуулукка жумшоого чакырышат.

Эрежелердин сакталышын көзөмөлдөөнү жергиликтүү администрацияларга жүктөө сунушталууда. Түшүндүрүү иштерине дин кызматкерлерин жана ардагерлер кеңештерин тартуу пландалууда.

Өзгөчө талаптар ресторан ээлерине жана тамадаларга тиешелүү болушу мүмкүн — аларга кардарларга ашыкча чыгымдарга алып келген кызматтарды таңуулоого тыюу салынат. Ал эми мамлекеттик кызматкерлер жөнөкөйлүктүн үлгүсү болушу керек: алар үчүн үй-бүлөлүк майрамдарды өткөрүүнүн атайын этикалык стандарттары иштелип чыгат.