Пакистандын Карачи шаарындагы ири соода борбору өрттөнүп, каза болгондордун саны 21ге жетти. Дагы 65 адам дайынсыз болууда. Бул тууралуу Reuters маалымат агенттиги жазып чыкты.

Gul Plaza соода комплексинде 1 миң 200дөй дүкөн жайгашкан. 18-январда чыккан тилсиз жоону өрт өчүрүүчүлөр бир суткадан ашык убакыт өчүрүшкөн. 19-январда түштөн кийин имараттын көпчүлүк бөлүгү урап калган. Күйгөн калдыктардын арасынан жоголгондорду издөө иштери дагы деле уланууда.

Синд провинциясынын башкы министри Мурад Али Шах өрттөн жаракат алган 22 адам ооруканадан чыгарылганын билдирди.

Тургундар өрт чыккан жерге өрт өчүрүүчүлөр кеч келишкенин, куткаруу иштери жай жүргүзүлгөнүн айтып, жергиликтүү бийликке нааразы болушууда.