Мамлекеттик салык кызматы чакан жана орто ишкердик субъекттерине карата рейддик салыктык көзөмөлдү жана контролдук сатып алууну убактылуу токтотту. Бул чечим бизнеске административдик басымды азайтуу жана ишкердикти өнүктүрүү үчүн шарттарды түзүү максатында кабыл алынган.

Ага ылайык, 2026-жылдын 31-декабрына чейин төмөнкү текшерүүлөр токтотулат:

• Контролдук-кассалык машиналарды (ККМ) жана эсеп-фактураларды колдонуу;
• Банктык төлөм карталарын, электрондук акчаларды жана QR-коддорду пайдалануу үчүн жабдуулардын болушу;
• Товарларга карата алгачкы эсепке алуу документтеринин бар же жок экендиги.

Бул чаралар төмөнкү ишкерлерге карата колдонулат:

• Бирдиктүү салыктын 0 жана 0,5 пайыздык ставкалары менен иштегендер;
• Патенттин негизинде иш жүргүзгөндөр;
• Өзгөчө режимдеги соода зонасында ишмердүүлүк кылгандар;
• Тигүү жана текстиль өндүрүшүндө 0,25 пайыздык ставка менен иштегендер.

Көзөмөлдөн бошотуу төмөнкү учурларга жайылтылбайт:

• Салыктык каттоосу жоктор же патентсиз иш жүргүзгөндөр;
• Жарандардан же уюмдардан даттануулар түшкөн, ошондой эле тергөө органдарынын токтомдору бар субъекттер;
• Салык төлөбөгөндүгү тууралуу тастыкталган маалыматтар же талдоонун жыйынтыктары бар учурлар;
• Акциздик товарларды саткандар (акциздик маркаларды текшерүү бөлүгүндө).

Салык кызматы ишкерлер арасында ККМ, эсеп-фактураларды жана накталай эмес төлөмдөр үчүн жабдууларды колдонуу боюнча түшүндүрүү иштерин жана практикалык жардам көрсөтүүнү улантарын кошумчалады.