Бүгүн, 10-мартка карата аба ырайынын өзгөрүшүнө байланыштуу Кыргызстандын тоолуу жолдорунда оор жүк ташуучу унааларга убактылуу чектөөлөр киргизилди. Бул тууралуу Транспорт жана коммуникациялар министрлиги билдирди.

Маалыматка ылайык, Өтмөк ашуусунда, Сосновка жана Арал постторунда оор жүк ташуучу унаалар үчүн чектөөлөр күчүндө турат.

Ашуулардагы учурдагы абал:

• Бишкек – Ош унаа жолу: Төө-Ашуу, Ала-Бел жана Көк-Бел ашууларында жеңил унаалар үчүн каттам бар.
• Суусамыр -Талас – Тараз жолу: Өтмөк ашуусунда жеңил унаалар өтө алат.
• Башка багыттар: Ош – Сары-Таш – Эркечтам жолунун Тоң-Мурун ашуусунда, Бишкек – Нарын – Торугарт жолунун Долон жана Түз-Бел ашууларында, ошондой эле Түп – Кеген жолунда жол ачык, каттам бар.

Учурда жол тейлөө ишканалары жана подряддык компаниялар тарабынан кар тазалоо, жолдорго инерттик материалдарды чачуу жана жол жээктерин кеңейтүү иштери жүргүзүлүүдө.

Министрлик айдоочуларды жол коопсуздугун камсыздоо үчүн ылдамдыкты сактоого, каршы тилкеге чыкпоого жана унаада керектүү техникалык шаймандарды ала жүрүүгө чакырат.