Мамлекеттик салык кызматы Улуттук банктын, Банктар союзунун, Банктар аралык процессинг борборунун жана коммерциялык банктардын жетекчилеринин катышуусунда кеңейтилген жыйын өткөрдү. Жолугушуу ишкерлер накталай эмес эсептешүүлөрдү колдонууда туш болгон административдик жана техникалык тоскоолдуктарды жоюуга арналды.

Талкуунун жүрүшүндө МСК бизнес-коомчулуктун негизги арыздарын айтты. Башкы көйгөйлөр катары төлөмдөрдү кабыл алуудагы жогорку комиссиялар, каражаттарды эсептерге чегерүүдөгү кечигүүлөр, ошондой эле QR-коддорду колдонууда банктык көчүрмөлөрдө (выпискаларда) төлөөчүлөр тууралуу маалыматтын жоктугу аталды. Мындан тышкары, ишкерлер банктар тарабынан ашыкча бюрократияга жана атайын эсептерди ачуунун татаал жол-жоболоруна нааразы.

Бизнес жүргүзүү шарттарын жакшыртуу үчүн Салык кызматы банк секторуна бир катар конкреттүү чараларды сунуштады. Атап айтканда, МСК чакан жана орто бизнеске комиссиялык жүктөмдү азайтууга жана транзакцияларды ошол замат чагылдыруу үчүн техникалык чечимдерди киргизүүгө басым жасоодо. Мекеме ошондой эле банктарды кардарлардын каттоосун текшерүү үчүн МСКнын санариптик кызматтарын колдонууга, ошону менен кагаз түрүндөгү маалымкаттарды талап кылууну жокко чыгарууга чакырды.

Эң маанилүү демилгелердин бири мыйзамдарга өзгөртүүлөрдү киргизүү идеясы болду, ал ишкерлерге коммерциялык ишмердүүлүк үчүн жеке жактардын электрондук капчыктарын мыйзамдуу түрдө колдонууга мүмкүндүк берет. МСК адистеринин пикиринде, бул бизнестин санариптик экономиканын шарттарына ыңгайлашуусун кыйла жөнөкөйлөтөт.

Улуттук банктын жана коммерциялык каржы институттарынын өкүлдөрү биргелешип иштөөгө даярдыгын тастыкташты. Жолугушуунун жыйынтыгы менен банк секторунун алдына тарифтик саясатты оптималдаштыруу жана процесстерди бюрократиядан арылтуу милдеттери коюлду. МСК накталай эмес жүгүртүүнү өнүктүрүү ишкерлер үчүн кошумча чектөөлөрдү жаратууга эмес, кызматтардын ыңгайлуулугуна жана ачык-айкындуулугуна таянышы керектигин баса белгиледи.