КР Суу ресурстары, айыл чарба жана кайра иштетүү өнөр жайы министрлиги алдыдагы себүү кампаниясына карата техникалык паркты даярдоонун жүрүшү тууралуу маалымдайт. Учурдагы маалыматка ылайык, республика боюнча айыл чарба машиналарынын жалпы даярдыгы 84%ды түзөт.

Өлкөнүн аграрийлеринин карамагында жалпысынан 92 миңден ашык техника бар. Жазгы иштерге даярдык көрүүнүн алкагында аймактарда масштабдуу оңдоо-калыбына келтирүү иштери жүргүзүлдү.

Техниканын негизги түрлөрү боюнча даярдык көрсөткүчтөрү:

• Тракторлор: 22 330 бирдиктин ичинен 18 465и (83%) ишке даяр;
• Жер семирткич чачкычтар: 87%;
• Трактор чиркегичтери: 86%;
• Тырмоолор жана пландоочулар: 85%;
• Соко жана канал казгычтар: 84%;
• Сепкичтер: 81%.

Бул жылкы жазгы талаа кампаниясында өлкө боюнча 8 миңден ашык айдоо агрегаттарын жана 3 миңден ашык себүү комплекстерин ишке тартуу пландалууда.

Тармактык ведомстводон координациялык иштер улантылып жатканын баса белгилешет. Негизги максат — аймактарда бардык агротехникалык иш-чаралардын өз убагында жана сапаттуу өткөрүлүшүн камсыз кылуу болуп саналат.