Куткаруучулар батирдин эшигин бузуп 2 жашар наристени алып чыгышты. Бул тууралуу Өзгөчө кырдаалдар министрлигинин басма сөз кызматынан билдиришти.

Маалыматка ылайык, бүгүн, 27-апрелге караган түнү түнкү саат 03:00дөр чамасында Аламүдүн-1 районунун тургундары 112 куткаруу кызматына чалып, эшиги жабык турган батирдин ичинде бала ыйлап жатканы аларды тынчсыздандырганын айтышкан.

Куткаруучулар барып, милиция кызматкерлеринин жана кошуналарынын катышуусунда, эшикти ачып беришкен. Батирде 2 жашар бала болгон. Анын медициналык жардамга муктаж эместигине ынангандан кийин, куткаруучулар аны милиция кызматкерлерине өткөрүп берген.

Учурда окуянын чоо-жайын милиция иликтеп жатат.