Бишкек ЖЭБи кышкыга даяр. Бул тууралуу «Электр станциялары» ишканасынын басма сөз катчысы Тагжана Айдаралиева билдирди.
Маалыматка ылайык, бардык жабдуулар керектүү көлөмдөгү оңдоп-даярдоо иштеринен өткөрүлдү.
«2019-2020-жылга күз-кыш жылытуу мезгили үчүн Бишкек ЖЭБине көмүрдү жеткирүүчүлөрдүн бири болуп «КонтактУглеПром» ТОО табылды. 1 027 219 008 сом бюджети менен 400 000 тонна көлөмдөгү Д, ДГ жана Г маркасындагы көмүрдү жеткирүүгө тендер 29-июлда жарыяланган. Баалоонун жыйынтыктары мамлекеттик сатып алуулар порталында 6-сентябрда жарыяланды. Жеткирүүлөрдүн графиги 2020-жылдын мартына чейин эсептелген, биринчи көлөмү сентябрда келет.
Учурда Бишкек ЖЭБинде 80 миң тонна көмүр бар. Кара-Кече отунун жеткирүүлөр жүргүзүлүп жатат. Станциянын үзгүлтүксүз иштеши үчүн ушул көлөм жетиштүү. Ошондой эле, ДСШ маркасындагы көмүрдү жеткирүүгө тендер ушул жумада жарыяланат. Жалпы күз-кыш жылытуу мезгилине Бишкек ЖЭБи үчүн 1 миллион 140 миң тонна көмүр даярдалат», — деп маалымдады басма сөз катчы.
Ишкана өткөн күнү 1 миллион 421 миң кВт/саат электр энергиясын иштеп чыккан. Ал эми кыш мезгилинде күнүнө 6-7 млн.кВт/саат чейин электр энергиясын иштеп чыгарат.
