Активист Адилет Балтабай ооруканага жаткырылганына байланыштуу бүгүн, 31-октябрда Чүйдүн Сокулук райондук сотундагы процесс болгон жок.
Мындан мурдараак Чүйдүн Сокулук районунун пробация органы активист Адилет Балтабайга буга чейин сот тарабынан белгиленген 3 жылдык пробацияны жокко чыгарып, эркиндигинен ажыратуу жазасын колдонуу өтүнүчү менен Сокулук райондук сотуна кайрылган. Соттук отурум 31-октябрга белгиленген.
Активист 30-октябрда Республикалык оорукананын Травматология бөлүмүнө жаткырылган. Ага байланыштуу бүгүнкү отурумга келе алган жок. Активист келбегендиктен жактоочу судьяга соттук процессти башка күнгө жылдыруу өтүнүчүн келтирди.
Сот өтүнүчтү канааттандырып, отурумду 3-ноябрга саат 09:30га белгиледи.
Эскерте кетсек, Адилет Балтабай 2022-жылдын 30-июнунда Биринчи май райондук милициясы тарабынан «массалык башаламандыктарга чакырык жасоого» шектелип кармалган. Ал кармалардан мурда Кыргызстанда кумарканалардын ачылышына каршы болуп, митингдерге чыгып жүргөн.
2-сентябрда Адилет Балтабайга ачылган кылмыш иши боюнча биринчи отурум өтүп, 11-ноябрда ага өкүм чыгарылган. Бишкектин Биринчи райондук соттун чечими менен Адилет Балтабай 5 жылга соттолуп, ошол эле учурда 3 жыл пробациялык мөөнөт белгиленип, эркиндикке чыккан.
2023-жылы 12-январда Адилет Балтабайдын иши Бишкек шаардык сотунда каралып, райондук соттун 3 жылдык пробациялык көзөмөл тууралуу чечими жокко чыгарылып, 5 жылга эркинен ажыратуу тууралуу өкүм күчүндө калтырылган. Адилет Балтабай сот залынан камакка алынган.
Кийин 19-апрелде Жогорку сот шаардык соттун өкүмүн жокко чыгарып, Биричи май райондук соттун пробация тууралуу өкүмү күчүндө калтырган. Адилет Балтабай ошол эле күнү абактан бошотулган.
Биздин Телеграм каналга катталыңыз
