«Ынтымак Ордо» мамлекеттик резиденциясында энергетика тармагындагы инвестициялык келишимдерди аткаруу маселелери боюнча жумушчу кеңешме болуп өттү. Министрлер кабинетинин башчысы Адылбек Касымалиев жаңылануучу жана салттуу энергия булактары жаатындагы долбоорлорду ишке ашырып жаткан 15тен ашык компаниянын жетекчилери менен иштин жүрүшүн талкуулады.

Жолугушуунун жүрүшүндө тараптар 18 инвестициялык келишимдин аткарылыш статусун талдашты. Кубаттуулуктун негизги көлөмү жаңылануучу энергетика секторуна туура келет: күн жана шамал электр станцияларын куруу боюнча 12 долбоор 5 450 МВт иштеп чыгарууга эсептелген. Бул демилгелерди ишке ашыруу 2023-жылдан бери жүрүп жатат.

Жаңылануучу энергия булактарынын долбоорлорунан тышкары, күн тартибине башка типтеги генерациялоочу объекттерди куруу боюнча макулдашуулар кирди:

• жалпы кубаттуулугу 2 239 МВт болгон үч гидроэлектростанция;
• жалпы кубаттуулугу 2 685 МВт болгон үч жылуулук электр борбору.

Кеңешменин катышуучулары курулуш иштеринин учурдагы этаптарын жана ишке ашыруу процессинде келип чыккан техникалык маселелерди талкуулашты. Адылбек Касымалиев келишимдерде бекитилген мөөнөттөрдү жана милдеттемелерди так сактоо зарылдыгын белгиледи.

Министрлер кабинетинин башчысы республикада электр энергиясын керектөөнүн өсүшү шарттарында жаңы кубаттуулуктарды ишке киргизүү артыкчылыктуу милдет экенин баса белгиледи. Өкмөт пайда болгон көйгөйлөрдү ыкчам чечүү жана объекттерди өз убагында пайдаланууга берүү үчүн инвесторлор менен системалуу өз ара аракеттенүүгө даярдыгын ырастады. Жолугушуунун жыйынтыгы менен тармактык ведомстволорго бул энергетикалык демилгелерди мындан ары коштоо боюнча тапшырмалар берилди.