Министрлер Кабинетинин төрагасы Адылбек Касымалиев өлкөгө биринчи жолу иш сапары менен келген ОПЕК Эл аралык өнүктүрүү фондунун президенти доктор Абдулхамид Аль-Халифа менен жолукту.

Өкмөттун маалыматына ылайык, жолугушууда акыркы үч жылда Кыргызстандын экономикасы орточо 9% өсүп, 2025-жылдын сегиз айында ИДПнын өсүшү 11%ды түзгөнү белгиленди. Ошондой эле 2030-жылга чейин ИДПнын көлөмүн кеминде 30 млрд долларга жеткирүү пландалып жатканы айтылды.

Адылбек Касымалиев өлкөдө электр энергиясынын тартыштыгы бар экенин, бул инвестициялардын зарылдыгын айкын көрсөтүп жатканын белгилеп, Камбар-Ата ГЭС-1 Борбор Азиядагы негизги энергетикалык долбоорлордун бири экенин кошумчалады.

Доктор Абдулхамид Аль-Халифа жылуу кабыл алгандыгы үчүн ыраазычылык билдирип, эки тараптуу инвестициялык жана финансылык кызматташтыкты күчөтүүгө кызыкдар экенин билдирди.