Мамлекеттик органдардын жетекчилеринин 2022-жылдын биринчи жарым жылдыгы үчүн отчеттук жумалыгы башталды. Бул тууралуу өкмөттүн басма сөз кызматы билдирди.
Маалыматка ылайык, 18-июлдан 28-июлга чейин министрликтердин жана ведомстволордун кызматкерлери жалпыга маалымдоо каражаттарынын өкүлдөрү, активисттер жана блогерлер менен жолугушууларды өткөрүп, анда иштин жыйынтыгы жана жакынкы, орто мөөнөттүү келечектеги милдеттер тууралуу сүйлөшөт.
«Жолугушуулар бейформал шартта өтөт. Алгач мамлекеттик органдардын жетекчилери биринчи жарым жылдыктын жыйынтыгы боюнча презентацияларды жасашат, андан кийин медиа чөйрөнүн өкүлдөрү жыйындын катышуучуларына кызыктырган суроолорун бере алышат», — деп билдирди министрлер кабинети.
