Бишкек шаарында 15 жаштагы өспүрүм сөөк жутуп алып, ал анын кызыл өңгөчүнө тыгылып калган. 3,5×4 см өлчөмүндөгү сөөктү дарыгерлер хирургиялык жол менен чыгарышты. Бул тууралуу Бишкек шаардык медициналык тез жардам балдар клиникалык ооруканасы билдирди.

Маалыматка ылайык, буга чейин өспүрүм шаардагы эки ооруканага кайрылган, бирок ал жерлерде сөөктү чыгаруу мүмкүн болгон эмес. Андан соң бейтап Бишкек шаардык медициналык тез жардам балдар клиникалык ооруканасына жеткирилген.

Аталган мекеменин хирургия бөлүмүнүн дарыгерлери тарабынан операция жасалып, тыгылып калган сөөк алынган. Операция адистердин жана профессорлордун катышуусунда жүргүзүлгөн. Учурда өспүрүмдүн абалы туруктуу, ден соолугу калыбына келүүдө.