Чүй, Ысык-Көл жана Нарын облустарынан жана Бишкек шаарынан аярлуу категориядагы 500 бала жайкы эс алууга жөнөтүлдү. Бул тууралуу Эмгек, социалдык камсыздоо жана миграция министрлиги билдирди.
Балдар 10-июндан баштап 22-июлга чейин эс алышат. Алардын жөнөтүлүшүн министр Равшанбек Сабиров өзү барып көзөмөлдөгөн.
Маалыматка ылайык, жалпысынан бул программада 6 агым каралган. Ага 1200 бала: 1000 өспүрүм жана 200 майыптуулугу бар балдар кирет. Майыптуулугу бар балдар сентябрь айында «Алтын-Балалык» борборунда реабилитациядан өтүшөт.
Программа жайкы мезгилде калктын социалдык аялуу катмарындагы балдардын ден соолугун жана бакубаттуулугун колдоого багытталган.
«Жайкы эс алууларды уюштурууга мамлекеттик бюджеттен 15 миллион сом бөлүндү. Мындан тышкары 2024-жылдын сентябрынан 2025-жылдын февралына чейин 600 ден соолугунун мүмкүнчүлүгү чектелген балдарга Президенттин резервдик фондунан колдоо көрсөтүлгөн”, – деди министр Равшанбек Сабиров.
