Энергетика министри Таалайбек Ибраев Манила шаарына болгон иш сапарынын алкагында Азия өнүктүрүү банкынын (АӨБ) жетекчилери менен жолугушуп, энергетика тармагындагы кызматташуу жана биргелешкен ири долбоорлорду ишке ашыруу боюнча сүйлөшүүлөрдү өткөрдү. Бул тууралуу Энергетика министрлиги билдирди.
Министр Таалайбек Ибраев аталган банктын Кыргызстанга көрсөткөн туруктуу колдоосу үчүн ыраазычылык билдирип, энергетика тармагын өнүктүрүүгө кошкон салымын жогору баалады. Жолугушууда бир катар долбоорлор жана сунуштар талкууланды:
- “Кыргыз энергетикалык эсептөө борбору” ААКнын МДМ системасын жаңыртуу үчүн АӨБдөн 940,8 миң доллар өлчөмүндө гранттык колдоо суралып, сунуш колдоо тапты.
- “Токтогул ГЭСин реабилитациялоо” долбоору 2025-жылы аяктайт. Министр “Күрпсай ГЭСин реабилитациялоо” (800 МВт) долбоорун баштоону сунуштады.
- “Үч-Коргон ГЭСин жаңылоо” долбоору боюнча иштер жүрүп жатат. Жыл сайын бирден гидроагрегатты ишке киргизүү менен долбоорду 2027-жылдын аягында аяктоо пландалууда. Бирок, өлкөдөгү электр энергиясынын таңсыктыгын кыскартуу боюнча программаларды эске алып, подрядчылар менен 2026-жылдын март майынан баштап эски 2 гидроагрегатты реабилитациялоого берүү маслеси сүйлөшүлдү. Бул планды ишке ашыруу үчүн АӨБнын колдоп берүүсүн сунуштады.
- «Чакан ГЭС» ААКна караштуу ГЭС-5те күн электр станциясын кеңейтүү долбоору (болжол менен 15 МВт кубаттуулукка чейин) талкууланып,АӨБ макулдугун берди.
- Инфраструктуралык долбоорлор – 110, 220 жана 500 кВ электр линияларын модернизациялоо маселеси көтөрүлдү.
- Камбар-Ата-1 ГЭСин куруу боюнча кызматташтык талкууланып, долбоордун биринчи этабы үчүн Азия өнүктүрүү банкы 130–150 млн АКШ долларын бөлүү мүмкүнчүлүгүн карап жатканы айтылды.
АӨБ жетекчилери Кыргызстандын энергетика тармагын өнүктүрүүгө багытталган бул сунуштар абдан маанилүү экенин баса белгилеп, бир катар долбоорлорду ишке ашырууга даяр экенин билдиришти. Жакынкы аралыкта тараптар Кыргызстанда кезектеги жолугушууну өткөрүүнү пландашууда.
