УКМК тарабынан саламаттыкты сактоо тармагындагы коррупциялык көрүнүштөрдү аныктоого багытталган иш-чаралардын жүрүшүндө Баткен облустук ооруканасынын кызматкерлери тарабынан жарандардан мыйзамсыз акча чогултуу фактылары аныкталды. Бул тууралуу УКМКдан билдиришти.
Тактап айтканда, сот тарабынан санкцияланган иш-чаралардын натыйжасында Баткен облустук ооруканасынын директорунун орун басары К.К.К. жана лаборант К.у.А. Саламаттык сактоо министринин 2023-жылдын 21-сентябрындагы №493 «Жарандарды медициналык-санитардык жардам менен камсыз кылуунун мамлекеттик кепилдиктеринин программасын бекитүү жөнүндө» буйругун бузуу менен узак убакыт бою жеке баюу максатында жарандардан рентген аппаратынын кызматы үчүн акча чогултуп келишкен. Рентген аппаратынын баасы түрүнө жараша 291 сомдон 496 сомго чейин болгон.
Козголгон кылмыш ишинин алкагында жана Баткен облусунун тергөө судьясы тарабынан жүргүзүлгөн атайын тергөө иш-чараларынын алкагында жогоруда аталган оорукананын кызматкерлери тарабынан мекеменин кассаларын айланып өтүү менен жарандардан акча каражаттарын системалуу түрдө алып жаткандыгы тууралуу маалымат келип түшкөн.
Аталган адамдардын мындан аркы мыйзамсыз аракеттерине бөгөт коюу максатында үстүбүздөгү жылдын 15-февралында Баткен облустук ооруканасынын директорунун орун басары К.К.К. жана лаборант К.у.А. кармалып, УКМКнын убактылуу кармоочу жайына киргизилди.
Азыркы учурда тергөө-ыкчам иш-чаралар жүргүзүлүп жатат, кармалгандар Кылмыш-жаза кодексинин 210-беренесинин 4-бөлүгүнүн 2-пунктунда “Өзүнүн кызматтык милдеттерин аткарууга байланыштуу ишенип берилген жактын мүлкүн же акча каражатын ыйгарып алуусу же коротуусу» каралган кылмышка шектелүүдө.
Биздин Телеграм каналга катталыңыз
