Баткен облусунун Раззаков шаарында жаңы муниципалдык мал базар толугу менен пайдаланууга берилди. Бул тууралуу Айыл чарба министрилиги билдирди.

Маалыматка ылайык, мал базардын жалпы аянты 60 миң м² түзөт. Ага миң баш бодо мал, 100 баш жылкы, 5 миң баш майда жандык батат.

Объектинин жалпы сметалык баасы 50 млн 558 миң сомду түзөт. Долбоордун 1 жана 2-этабына 25 988 507 сом каражат жумшалган.

Мал базардын ишке кириши менен Раззаков шаарынын калкы үчүн ветеринардык, соода-сатык жана санитардык шарттары жакшыртылып, айыл чарба тармагында кошумча киреше булагы түзүлдү.

“Бүгүнкү күндө мал базар өз ишмердүүлүгүн жүргүзүп, жумасына 70 миң – 150 миң сом киреше алып келүүдө. Ошондой эле ушул жылдын ичинде ички бөлүгүнө асфальт төшөө жана оорукчан малдар үчүн атайын изолятор куруу каралууда”,- деп билдирди министрлик.