Бишкек мэриясынын Жер ресурстар башкармалыгы муниципалдык жер тилкелерин пайдалангандыгы үчүн дебитордук карыздарды чогултууну улантууда. Бул тууралуу мэриянын маалымат кызматынан кабарлашты.
Анын алкагында, шаарга 1,5 миллион сом кайтарылды.
«2014-жылы Бишкек шаарындагы жер тилкелерине укук берүү боюнча комиссиянын чечими менен Өскөмбаев С.Д. аянты 82,5 чарчы метр жер тилкеси дүкөндү долбоорлоо жана куруу үчүн 5 жылдык мөөнөткө ижарага убактылуу пайдаланууга берилген.
Бирок, ижарачы келишимдин шарттарын бузуп, муниципалдык менчикти пайдалангандыгы үчүн акча төлөгөн эмес.
Биздин көптөгөн эскертүүлөрүбүзгө карабастан, ижара төлөмдөрү боюнча карыздар 2019-жылдын экинчи кварталын эске алуу менен түзүлгөн, башкача айтканда, келишимдин мөөнөтү бүткөнгө чейин. Бүгүнкү күнгө чейин, ижарачы шаарга 963 миң 369,96 сом карыз, ага кошумча карыздын көрсөтүлгөн суммасынын 25% өлчөмүндө туум — 240 миң 842,49 сом, жерди пайдалангандыгы үчүн карыз 225 463,17 сомду түзгөн.
ЖРБ Октябрь райондук сотуна доо арыз менен кайрылган.
Соттун 2020-жылдын 9-декабрындагы чечими менен С.Д. Өскөмбаевге карата ЖРБнын карыздарды өндүрүү боюнча доо арызы канааттандырылып, шаардын пайдасына 1 миллион 429 миң 675,62 сом өндүрүлдү», — деп жазылат маалыматта.
Калаа бийлиги муниципалдык жерди пайдалануудагы ижара акысын өз убагында төлөө керектигин эскертти.
Жер маселелери боюнча мэриянын Жер ресурстар башкармалыгына кайрылса болот. Дареги: Чокморов көчөсү, 246, телефон: (0312) 45-42-73 же WhatsApp 0701012555.
