Бишкекте 70 жаштагы аялды 2 унаа катар сүзүп көз жумду. Бул тууралуу Милициянын кайгуул кызматынан кабарлашты.
Маалыматка ылайык, 20-декабрда эртең менен Юнусалиев көчөсүндө 70 жаштагы Н.В. аттуу аялды автоунаа сүзүп, качып кеткен. Жолдон өтүп бара жаткан адамдар аталган аялга жардам көргөзүп жатканда Toyota-4Runner үлгүсүндөгү автоунаа келип, аларды сүзүп кеткен.
Анын натыйжасында 70 жаштагы Н.В. атуу аял ошол жерде каза болуп, ага жардам бергиси келген М.А. аттуу 30 жаштагы жигит жаракат алып ооруканага жеткирилген.
Милициянын кайгуул кызматы ыкчам иликтөөнү жүргүзүп, аялды сүзүп качып кеткен Volkswagen-Passat үлгүсүндөгү автоунааны аныктап, анын 65 жаштагы С.Э. атуу айдоочусун кармаган.
Эки автоунаа тең айып короосуна токтотулуп, факты боюнча сотко чейинки өндүрүш башталган.
